Óttast að 120 störf hverfi með kvótanum

Bæjarráð Ísafjarðarbæjar hvetur sjávar- og landbúnaðarráðherra að taka tillit til þeirra hagsmuna sem í húfi eru á norðanverðum Vestfjörðum þegar hann tekur ákvörðun um framhald úthafsrækjuveiða. Í ályktun bæjarráðs segir að störf 120 manns séu í húfi. Jón Guðbjartsson, stjórnarformaður rækjuvinnslunnar Kamps, segir að framtíð veiðanna geti ráðist með þessari ákvörðun.

Árið 2010 gaf Jón Bjarnason, þáverandi sjávarútvegsráðherra, úthafsrækjuveiðar frjálsar. Stjórnvöld stöðvuðu þær hins vegar síðastliðinn mánudag og hafa látið að því liggja að tilefni sé til breytinga á stjórnun þeirra. „Á þessum þremur árum hefur rækjuvinnslan Kampi byggt gríðarlega mikið upp hér á Ísafirði,“ segir Daníel Jakobsson bæjarstjóri.

„Til dæmis hafa þeir tekið atvinnuhúsnæði í gegn sem áður var lítil reisn yfir.“ Hann segir Ísfirðinga óttast að úthafsrækjukvótinn verði úthlutaður eldri kvótahöfum, það er að segja þeim sem áttu kvótann áður en veiðarnar voru gefnar frjálsar.

Haft er eftir Brynjari Ingasyni í Kampa á fréttavefnum BB að þá hafi kvótahafar veitt 12 prósent kvótans meðan 88 prósent voru leigð út. Jón Guðbjartsson segir að ef sú leið verði farin muni rækjuvinnslan leggjast af. „Og þá mæli ég fyrir munn allra þeirra sem standa í rækjuvinnslu í dag,“ segir hann. Sex rækjuvinnslur eru nú starfandi í landinu.

Slegið var til sjávarréttarveislu við höfnina á Ísafirði í hádeginu á þriðjudag þegar úthafsrækjubátar komu úr sinni síðustu ferð. Tilefni veislunnar var ekki klárt þegar Jón var inntur eftir því.

„Ef stjórnvöld fara þá leið sem LÍÚ leggur til og bindur kvótann við útgerðirnar sem áttu skipin sem leigð voru til þessara veiða fyrir margt löngu þá ku þetta vera erfidrykkja því þá mun fólk ekki sjá þessa úthafsrækju aftur. En ef þetta verður falið þeim sem hafa stundað þessar veiðar undanfarið þá er þetta veisla,“ segir hann.

Daníel gagnrýnir einnig þá meðhöndlun stjórnvalda að stöðva veiðarnar án þess að hafa svör á reiðum höndum um hvað taki við.