Ólafur Ragnar síðasta hálmstráið

Nú hafa safnast rúmlega 35 þúsund undirskriftir gegn frumvarpi sjávarútvegsráðherra sem miðar að lækkun veiðileyfagjalda. Undirskriftunum var beint að Alþingi og þá að Ólafi Ragnari Grímssyni forseta Íslands. Búið er að afgreiða málið í annarri umræðu á þingi og því nánast formsatriði að frumvarpið verði samþykkt á þingi í dag. Aðstandendur söfnunarinnar stefna því á fund forseta Íslands.

Undirskriftasöfnunin hófst 17. júní og má segja að hún hafi gengið vonum framar. Ísak Jónsson, annar hvatamanna undirskriftasöfnunarinnar segir nú liggja fyrir að þingið hafi hunsað söfnunina en aðstandendur hennar voru meðal annars kallaðir fyrir þingnefnd og á fund sjávarútvegsráðherra. Forseti Íslands er því síðasta hálmstráið ef koma á í veg fyrir að lögin taki gildi.

„Ef þetta verður samþykkt sem lög frá alþingi, þá munum við panta fund með forseta til að afhenda undirskriftirnar. Það þarf að fara yfir þær, og keyra saman við Þjóðskrá og eyða vafaatriðum. Og í kjölfarið verða honum afhentar þessar undirskriftir,“ segir Ísak.

Nýleg skoðanakönnun Fréttablaðsins og Stöðvar 2 leiddi í ljós að um 70 prósent landsmanna eru mótfallin lækkun veiðileyfagjalda. Og nú liggja fyrir undirskriftir rúmlega 35 þúsund einstaklinga í þá veru þannig að ekki er úr vegi að tala um gjá milli þings og þjóðar. En, hefur Ísak engar áhyggjur af því að forsetinn klekki á þeim, hafi nú hraðar hendur og flýti sér að skrifa undir lögin áður en hann fær undirskriftirnar í hendur og til formlegrar afgreiðslu?

„Við höfum mjög litlar áhyggjur af því. Það er búið að tilkynna honum um þessa undirskriftasöfnun. Þannig að hann veit alveg af henni, þessari undirskriftasöfnun sem snýr að þessu tiltekna frumvarpi. Þá höfum við sent formlegt bréf til hans. Þannig að ég hef afskaplega litlar áhyggjur af því að hann geri það,“ segir Ísak og telur ljóst að með slíkri afgreiðslu muni orðspor forsetans verða fyrir verulegum skaða.