Stuðningsmenn WikiLeaks tífalt fleiri en íslenska þjóðin

Lögmenn WikiLeaks og Valitor deila nú um það hversu háar skaðabætur greiðslukortafyrirtækið eigi að greiða uppljóstrunarsíðunni, eftir að greiðslugátt til hennar var lokað í tæp tvö ár. Málið verður tekið fyrir hjá dómstólum á næstu vikum.

Það er íslenska fyrirtækið Sunshine Press Productions, sem rekur WikiLeaks og DataCell, sem krefur Valitor um níu milljarða í skaðabætur eftir að greiðslugátt til WikiLeaks var lokað í tæplega tvö ár. Í apríl komst Hæstiréttur að því að Valitor hafi verið óheimilt að loka fyrir greiðslur til uppljóstrunarsíðunnar. Greiðslugáttin var opnuð á ný en WikiLeaks og DataCell telja sig hafa orðið fyrir miklu tjóni á þessum tíma.

Nú deila menn um það hversu mikið tjónið er. WikiLeaks og DataCell segjast hafa fengið ráðgjafafyrirtæki til að meta tjónið, sem hafi komist að þeirri niðurstöðu að það sé á bilinu 1,5 til 8,8 milljarðar króna. Valitor segjast hinsvegar ekki skulda þeim neitt.

Sveinn Andri Sveinsson, lögmaður WikiLeaks, segir að greiðslugáttin hafi verið opin í 7 klukkustundir áður en henni hafi verið lokað.

„Út frá þessum tölum, þá áætla menn hvað hefði mátt ætla að há prósenta af fylgjendum þessarar uppljóstrunarsíðu WikiLeaks, hefðu komið til með að styrkja samtökin," segir hann.

Sigurður G. Guðjónsson, lögmaður Valitor, segir að fyrirtækið fallist ekki á þessa reikninga ráðgjafafyrirtækisins.

„Það framreiknaði þær fjárhæði sem hugsanlega hefði getað safnaðst, hefði verið opið fyrir þetta í 671 í dag eða þann tíma sem greiðslugáttin var lokuð. Það sem safnaðist á þessum klukkustundum, sem var opið áður en það var lokað, það er framreiknað og „skalað“ upp á þennan 671 dag. Bara eins og það hefði átt að safnast nánast á hverri klukkustund jafnmikið og að meðaltali safnaðist þessarar klukkustundir sem að var opið," segir Sigurður G.

Bendir Sigurður einnig á að fyrirtækið Sunshine Press Productions hafi skilað inn einu ársreikningi, og það var fyrir árið 2010. Engir ársreikningar séu til fyrir árin 2011, 2012 og 2013. Því sé ekki hægt að segja til um það hvert tjónið er, eða þá hvort það sé nokkuð.

Sveinn Andri segir að málið verði tekið fyrir hjá dómstólum á næstu misserum.

„Mönnum kann að þykja þessar tölur háar, þær eru vissulega háar í hinu íslenska samhengi. En þarna er verið að ræða um alþjóðleg samtök þar sem stuðningsmenn þessarar samtaka eru tífallt fleiri en íslenska þjóðin.“