Gæti þurft að senda sjúklinga til útlanda

Hjúkrunarfræðingar sem sagt hafa upp störfum við Landspítalann hafa fram í byrjun næstu viku til að sjá sig um hönd. Ekki næst saman í samninganefnd um endurskoðun stofnanasamnings. Spítalinn undirbýr einhliða breytingar á kjörum.

Komi í ljós að þorri þeirra hjúkrunarfræðinga sem sagt hafa upp störfum á Landspítalanum (LSH) ætli ekki að snúa aftur þar til starfa hefst endurskipulagning á starfsemi spítalans. Hluti af slíkri endurskoðun yrði að ákveða hvaða sjúklinga þyrfti að senda til útlanda í aðgerðir.

Uppsagnir 260 hjúkrunarfræðinga taka gildi um næstu mánaðamót og tuttugu til viðbótar mánuði síðar. Eftir stíf fundahöld síðustu vikur í samstarfsnefnd um endurskoðun stofnanasamnings hjúkrunarfræðinga lýsti spítalinn því yfir fyrir síðustu helgi að til stæði að hækka laun hjúkrunarfræðinga í samræmi við framlag ríkisstjórnarinnar í tengslum við svokallaða jafnlaunastefnu. Við breytinguna hækka laun hjúkrunarfræðinga að meðaltali um 25 þúsund krónur á mánuði.

Fulltrúar hjúkrunarfræðinga kynntu í gær samstarfsnefndinni, eftir afgerandi niðurstöðu á hópfundi hjúkrunarfræðinga á mánudagskvöld, að þeir ætluðu ekki að vera með í endurnýjun samningsins eins og hún hefði verið lögð upp.

„Ef þetta heldur svona áfram yfir lengri tíma mun heilbrigðisþjónusta ekki vera sú sama og áður á Íslandi," segir Björn Zoëga, forstjóri LSH. Stór hluti hjúkrunarfræðinganna sem sagt hafa upp sinnir mjög sérhæfðum störfum.

Björn segir að endurskipulagning á starfsemi spítalans verði hafin þegar fyrir liggi hvort allir standi við uppsögn sína. Spítalinn vinni hins vegar áfram út frá þeirri forsendu að deilan leysist.

Að sögn Björns hafa þeir hjúkrunarfræðingar sem sagt hafa upp frest til 12. þessa mánaðar til að gera upp hug sinn varðandi afturköllun uppsagnar. Vonir spítalans standa til þess að uppsagnirnar gangi ekki eftir.

„En núna er okkar verkefni að sjá til þess að þessir peningar sem við höfum gangi til okkar starfsmanna eftir þeim línum sem um hefur verið rætt í samstarfsnefndinni."

Þá segir Björn skilaboðin síðustu tvær vikur hafa verið mjög skýr frá ríkisvaldinu um að spítalinn fengi ekki hærri upphæðir til að vinna með en þegar hafi verið veittar til lausnar deilunni. „Eins og staðan er núna sé ég ekki að einhver nýr peningur sé að koma inn í þetta þótt við myndum auðvitað fagna slíku. Við höfum oft sagt að okkar fólk sé almennt of lágt launað og það myndi gefa okkur tækifæri til að leiðrétta eins mikið og hægt er."