Hæstiréttur gerði alvarleg mistök - Hvernig getur þetta verið skýrara?

Ragnheiður Bragadóttir, prófessor við lagadeild Háskóla Íslands og höfundur kynferðisbrotakafla almennra hegningarlaga, segir að Hæstiréttur hafi gert „alvarleg mistök" með dómi sínum síðastliðinn fimmtudag.

Hæstiréttur taldi það ekki sem kynferðisbrot þegar maður stakk fingum upp í endaþarm og leggöng konu, og klemmdi á milli. Dómurinn telur brotið vera „illyrmislega líkamsárás sem fellur undir 2. mgr. 218.gr.laganna" en héraðsdómur hafði áður komist að því að um nauðgun hafi verið að ræða.

Ragnheiður skrifar grein í Fréttablaðið í dag, þar sem hún fer yfir dóm Hæstaréttar. Árið 2007 var kynferðisbrotakaflinn endurskoðaður. „Við þá endurskoðun var norræn löggjöf höfð til hliðsjónar, ekki síst nýlegar breytingar á kynferðisbrotaköflum norsku og sænsku hegningarlaganna. Fræðimenn, bæði á Íslandi og í hinum norrænu ríkjunum, hafa fjallað um það hvað felist í hugtakinu önnur kynferðismök. Um þetta hugtak gildir, eins og margt annað í refsiréttinum, að það verður ekki skilgreint nákvæmlega heldur byggist það á mati hverju sinni. Enginn vafi er þó á því að þar undir falla m.a. athafnir sem beinast að kynfærum, eins og það að setja fingur í leggöng eða endaþarm þolanda. Þessi tilteknu dæmi eru meira að segja sérstaklega tilgreind í greinargerð með lögunum frá 2007, eins og fram kemur í áliti minnihlutans, svo hvernig getur þetta verið skýrara?"

Hún segir að með lögunum frá 2007 sé áherslan lögð á einstaklinginn sem fyrir brotinu verður og vernd hans gegn kynferðislegu ofbeldi. „Grundvallarmarkmið 194. gr. hgl. um nauðgun er að vernda kynfrelsi fólks og í því sambandi skiptir engu máli fyrir þolanda hvort gerandi sækist eftir kynferðislegri fullnægingu eður ei. Því er ekki annað hægt en að líta á dóm meirihluta Hæstaréttar sem alvarleg mistök sem ekki geta haft fordæmisgildi," segir hún.

Hægt er að lesa grein Ragnheiðar hér.