Bleiklitaðir slökkviliðsmenn fögnuðu Mottumars

Slökkvilið höfuðborgarsvæðisins og Landssamband slökkviliðs- og sjúkraflutningamanna standa í dag fyrir formlegu upphafi Mottumars-átaksins í samvinnu við Krabbameinsfélag Íslands. Slökkviliðs- og sjúkraflutningamenn um allt land ætla að klæðast bleikum bolum í starfi á meðan átakið stendur yfir til að vekja athygli á málstaðnum.

Birgir Finnsson, aðstoðarslökkviliðsstjóri slökkviliðsins, tók á móti gestum og kynnti áherslur á forvarnir innan SHS, en slökkviliðsmenn eru í áhættuhópi að fá krabbamein vegna reykköfunar.

„Með þessu viljum við taka þátt í að vekja athygli á þessum málstað og þeirri staðreynd að Slökkviliðsmenn eru í áhættuhópi við að fá krabbamein vegna reykköfunar. Við höfum verið að efla forvarnir í þessu sambandi og m.a. breytt vinnubrögðum og verkferlum hér innandyra til að draga úr áhættunni," sagði Birgir Finnsson, aðstoðarslökkviliðsstjóri Slökkviliðsins á höfuðborgarsvæðinu.