Tíu mánaða fangelsi fyrir að hóta lögreglumönnum

Karlmaður var í Héraðsdómi Reykjaness í morgun dæmdur í tíu mánaða fangelsi fyrir það að hafa hótað tveimur lögreglumönnum í ágúst síðastliðnum með því að segjast ætla að blóðga sig og smita þá með lifrarbólgu ef lögreglumennirnir reyndu að nálgast hann.

Maðurinn var staðsettur í fangageymslu í húsnæði lögreglunnar þegar atvikið varð og var verið að tilkynna honum að hann yrði færður til lengri afplánunar daginn eftir. Maðurinn lét ófriðlega þegar lögreglumennirnir ræddu við hann. Hann barði meðal annars veggi og hurð.

Þá var maðurinn líka sakfelldur fyrir þjófnað með því að hafa farið í heimildarleysi inn í bíl af gerðinni Kia sem stóð á bílastæði við bílapartasöluna Hringbraut, Bogatröð, og stolið fimm gólfmottum.