Stuðningsgrein: Til stuðnings Guðbjarti

Í Samfylkingunni, einum stjórnmálaflokka á Íslandi, geta allir skráðir félagar tekið þátt í vali formanns. Ég er bæði stolt og ánægð með að vera í slíkum flokki, sem virðir mikilvægi lýðræðislegrar þátttöku og stuðlar að henni með virkum hætti. Það styrkir niðurstöðuna og stuðlar að aukinni samstöðu. Þetta fyrirkomulag hefur líka sýnt sig að stuðli að málefnalegri umræðu og heiðarlegri baráttu, Samfylkingunni sem stjórnmálaflokki til heilla.

Fram til þessa hefur baráttan milli frambjóðendanna tveggja einkennst af málefnalegri og uppbyggilegri umræðu og gagnkvæmri virðingu frambjóðendanna. Það er þeim og flokknum til mikils sóma. Það er góð vegferð og þar skulum við vera. Við skulum nýta þetta dýrmæta tækifæri sem felst í svo víðtækri þátttöku til að styrkja okkur sem heild og efla okkur til framtíðar.

Næsti formaður Samfylkingarinnar þarf að hafa skýra framtíðarsýn og vera tilbúinn að fylgja eftir stefnu flokksins og virða þau grunngildi sem Samfylkingin byggir á. Samfylkingin þarf leiðtoga sem hefur skýra sýn á framtíðina, sem sér tækifærin í íslensku samfélagi og gerir sér grein fyrir mikilvægi þess að við byggjum upp heilbrigt samfélag sem stenst samanburð við það sem best gerist í nágrannalöndum okkar. Hann þarf að tala skýrt í Evrópumálum og vera tilbúinn að fylgja eftir þeirri eindregnu stefnu sem flokkurinn hefur mótað og samþykkt á því sviði.

Næsti formaður Samfylkingarinnar þarf að skilja og viðurkenna mikilvægi samspils öflugs atvinnulífs og velferðarkerfis, sem ekki eru álitin andstæður heldur forsendur hvort annars. Hann þarf að vera þess meðvitaður að eftir þá erfiðleika sem íslenskt samfélag hefur glímt við og þá óvissu sem þeim hefur fylgt, þá sé það ein af forsendum þess að okkur takist að snúa vörn í sókn.

Ég ætla að styðja Guðbjart Hannesson til að gegna formennsku í Samfylkingunni vegna þess að ég trúi því að hann sé líklegastur til verða sá öflugi leiðtogi sem við þurfum til að byggja upp samstöðu í stórum flokki jafnaðarmanna og félagshyggjufólks og samfélaginu almennt. Hann hefur skýra sýn á framtíðina og hann þorir að segja hvað í henni felst. Hann leggur sig fram um að virða ólík sjónarmið og ber virðingu fyrir þeim sem hann starfar með og hann starfar fyrir. Ég ætla að styðja Guðbjart vegna þess að ég þekki til hans verka og ég veit hvað hann stendur fyrir. Hann er drifinn áfram af einlægum áhuga á samfélaginu og vilja til að bæta það. Guðbjartur, er einfaldlega gegnheill maður, heiðarlegur, ábyrgur og harðduglegur.

Ég ætla að styðja Guðbjart í formannskosningunni sem hefst 18. janúar nk.