Landsbjörg stendur vaktina á hálendinu

Seinnipartinn í dag munu fyrstu hópar sjálfboðaliða Slysavarnafélagsins Landsbjargar leggja af stað upp á hálendið. Í tilkynningu frá Landsbjörgu segir að eins og fyrri ár muni vaktin verða staðin á fjórum stöðum á hálendinu og verði hver hópur viku í senn.

Á síðasta ári hafi borist tæplega tvö þúsund atvik inn á borð björgunarsveita á hálendinu á átta vikna tímabili. Hóparnir séu allt eins búnir undir að þessum atvikum fjölgi þetta sumarið enda líklegt að ferðamönnum fjölgi í sumar. Útköllum björgunarsveita hafi fjölgað gríðarlega síðustu árin vegna aukins ferðamannastraums og aukningar á ferðamennsku íslendinga. Sjálfboðaliðar Landsbjargar munu standa vaktina á ÓB og Olís stöðvum um land allt í dag og afhenda ferðalöngum poka með fræðsluefni og glaðningi og hvetja til öruggra ferðalaga.