Rafmagnsvespur verða skráningarskyldar

Léttar rafmagnsvespur sem sjást nú víða á göngustígum verða skráningarskyldar og sérstök réttindi þarf til að aka þeim ef ný umferðarlög taka gildi. Mörg dæmi eru um misnotkun á þessum tækjum.

Eins og stendur falla rafmagnsvespur sem komast upp í 25 kílómetra hraða undir sama flokk og reiðhjól í umferðarlögum. Ný umferðarlög verða líklega lögð fyrir Alþingi í haust og ef þau fara í gegn mun reglugerðin í kringum vespurnar verða strangari. 

„Þær verða skráningarskyldar, það þarf að tryggja þær og það þarf sérstök réttindi til að aka þeim," segir Einar Magnús Magnússon upplýsingafulltrúi Umferðarstofu.

Einar segir að þau lög sem gildi núna um rafmagnsvespur séu barns síns tíma, þær séu skilgreindar sem reiðhjól og lúti sömu reglum og þau að því undanskyldu að það má eingöngu aka vespunum á gangstígum. En með nýju lögunum mega vespurnar fara af gangstígum og út í almenna umferð þar sem er fimmtíu kílómetra hámarkshraði eða minni.

„Það hefur í rauninni verið ákveðið regluleysi varðandi þessi tæki. Ég held að það verði komið betri skikki á það hvernig þessi tæki eru notuð og að það stafi ekki hætta af. En því skal haldið til haga að þessi tæki eru stórsniðug, það er alveg óhætt að hvetja fólk til að nota þau en það skiptir máli að þau séu notuð rétt og að það stafi ekki hætta af notkun þeirra."

Einar segir að það séu því miður ansi mörg alvarleg dæmi um misnotkun á vespum og margar ábendingar um slíkt komi inn á borð Umferðarstofu. Eigendur vespa gleymi stundum að líta á þær sem ökutæki.

„Við heyrum af því að börn séu á þessu reiðandi hvert annað, jafnvel fleiri en tvö, en það er bannað að vera fleiri en einn á þessu. Að það sé verið að keyra mjög óvarlega innan um gangandi vegfarendur, það er ekki gætt að reglum varðandi rautt ljós og stöðvunarskyldu og svo framvegis," segir Einar.