Kolbeinn fer í myndatöku á morgun

Kolbeinn Sigþórsson, framherji íslenska landsliðsins, varð fyrir slæmum meiðslum í landsleik Íslands og Króata á Laugardalsvelli í kvöld.

Birt var frétt þess efnis á Mbl.is fyrr í kvöld að Kolbeinn væri með slitin liðbönd. Það hefur nú verið dregið tilbaka og sett spurningamerki við meiðsli framherjans.

Kolbeinn missteig sig illa undir lok fyrri hálfleiks og var umsvifalaust borinn af velli. Landsliðsþjálfarinn Lars Lagerbäck sagði á blaðamannafundi eftir leik að Kolbeinn hefði snúið sig á ökkla. Óvíst væri um framhaldið en framherjinn færi í röntgenmyndatöku á morgun.

Nýr leikmaður verður ekki kallaður inn í hópinn í stað Kolbeins því Birkir Már Sævarsson kemur aftur inn eftir að hafa tekið út leikbann í kvöld.