Jákvæður tónn á fundi formanna - stefna á annan fund

Fundi formanna stjórnmálaflokkanna er lokið en hann virðist hafa verið jákvæður. Stefnt er á að hittast aftur og ræða málin betur síðar en engin dagsetning er komin á nýjan fund. Á fundinum var meðal annars rætt um lyktir stjórnarskrármálsins, en Árni Páll Árnason, formaður Samfylkingarinnar, reifaði þá hugmynd fyrr í vikunni að heildarendurskoðun stjórnarskrárinnar yrði frestað.

„Við fórum yfir stöðuna og ræddum möguleikann til þess að ljúka öllum þessum málum sem liggja fyrir," sagði Árni Páll skömmu eftir að fundi formanna stjórnmálaflokkanna lauk á Alþingi. Þar var meðal annars rætt um það hvort flokkarnir gætu klárað stjórnarskrármálið fyrir þinglok sem verða 15. mars næstkomandi. Árni Páll segir að andrúmsloftið á fundinum hafa verið jákvætt en segist ekki geta farið nákvæmlega út í það sem fram fór á fundinum.

„Menn voru allavega tilbúnir að ræða þetta og við ræðum málið áfram. Við munum örugglega hittast áfram," sagði Árni Páll og sagði stöðuna ansi opna. Spurður hvort Hreyfingin væri ósátt við það sem fram fór á fundinum, en Birgitta Jónsdóttir sat fyrir hönd Hreyfingarinnar á fundinum, sagðist hann ekki geta talað fyrir hönd annarra. Birgitta neitaði að tjá sig um fundinn á eftir og sagðist fyrst þurfa að útskýra fyrir þingflokknum hvað þar fór fram. Þór Saari, þingmaður Hreyfingarinnar, hefur hótað að leggja aftur fram vantrauststillögu verði stjórnarskrármálinu lokið á þessu þingi.

Katrín Jakobsdóttir, formaður Vinstri grænna, tók í sama streng og Árni Páll og sagði tóninn á fundinum hafa verið góðan. „Fólk er reiðubúið að skoða leiðir í þessu," sagði hún og sagði áframhaldandi samskipti verða á milli formannanna þó svo að næsti fundur hafi ekki verið ákveðinn.

Bjarni Benediktsson segir djúpan ágreining um stjórnarskrármálið en sagði Sjálfstæðisflokkinn ekki ætla að skella neinum hurðum. Hann tók aftur á móti skýrt fram að það væri ekki hægt að binda hendur næstu ríkisstjórnar.