"Fólk er svo gratt í árangur"

Magaverkir og útbrot eru þekktar aukaverkanir af neyslu fæðubótaefna að sögn læknis sem mælir ekki með notkun slíkra efna. Einkaþjálfari segir yngra fólk í líkamsrækt oft spyrja út í notkun ólöglegra megrunarpilla og stera en áhuginn á slíku hafi þó minnkað síðustu ár.

Sigríður Dóra Magnúsdóttir yfirlæknir á Heilsugæslunni Miðbæ segir fæðubótarefni ekki eins saklaus og þau líta út fyrir að vera, þau geta haft óæskilegar aukaverkanir og það hefur hún séð í sínu starfi.

„Við erum bæði að sjá meltingaróþol, meltingarónot, magaverki, magabólgur og meltingatruflanir ýmsar. Það er búið að lýsa lifrabólgu af notkun ýmsra fæðubótaefna. Svo erum við að sjá líka talsvert af ofnæmi, útbrotum, kláða, húðútbrotum. Það er ýmsileg sem kemur hingað en tekur alltaf dálítinn tíma að fá fram söguna.“

Hún segir sjúklingana oftast í yngri kantinum og að þeir séu oft að borða of mikið af fæðubótarefnum og of margar tegundir.

„Ég held að við læknar almennt og heilbrigðisstarfsfólk almennt gerum okkur grein fyrir því að það eru engar töfraleiðir eða skemmri skýrnir að heilbrigðu lífi, þetta þarf að vinnnast jafnt og þétt og er ekki keypt í dós.“

Yngra fólk kemur líka frekar upp að einkaþjálfara í ræktinni og spyr hann að því hvernig eigi að nota fæðubótarefni, nálgast ólöglegar megrunarpillur og stera. Hann segist þó hafa tilfinningu fyrir því að notkun á slíku hafi dregist saman.

„Mér finnst fólk vera skynsamara en það var áður, mér finnst vera meiri þekking í þjóðfélaginu. En aftur þetta yngra lið, kannski hugsar þetta ekki alveg til enda, finnst það vera ódauðlegt og er tilbúið að prófa allt og þá oft leitar það í svona.“

Konráð mælir gegn öllu slíku og vill að fólk komi sér í form á heilbrigðan og skynsaman hátt. En:

„Fólk er svo gratt í árangur, það vill að allt gerist núna og það er erfitt að tjónka við það."