Nigella bætist í hóp beittustu viðtala Opruh

Í réttarhöldunum yfir Nigellu Lawson í vikunni kom meðal annars fram að matseljan fræga hefur skrifað undir samning við spjallþáttadrottninguna Opruh Winfrey.

Nigella ætlar að koma fram í opinskáu viðtali við hana snemma á næsta ári, þar sem hún mun rjúfa þögnina sem snýr að hjónabandi hennar og skilnaði við safnarann og galleríistann Charles Saatchi, orðrómana um fíkniefnaneyslu, sambandið við aðstoðarkonurnar Elisabetta og Francesca Grillo og dómsmálið sem hefur verið á forsíðum allra blaða í heimalandi matseljunnar frægu, Bretlandi og þótt víðar væri leitað.

Þar sem einhver bið er eftir viðtalinu, er tilvalið að rifja upp einhver þau opinskáustu og beittustu viðtöl sem Oprah hefur tekið í gegnum árin.

1. Þegar Lindsay Lohan játaði fíkn sína

Lindsay Lohan settist niður með Opruh í ágúst á þessu ári til þess að „deila sannleikanum“ eftir að hún kom úr áfengis- og vímuefnameðferð. Stjarnan umdeilda talaði um sjálfa sig sem fíkil og lýsti stormasömu sambandi sínu við foreldrana. Hún ræddi um vont orðspor sem hún hafði skapað sér í kvikmyndabransanum og hvernig hún vonaðist til þess að snúa því við.

„Svo lengi sem ég er hreinskilin við sjálfa mig og vinn vinnuna mína, er ekkert sem stendur í vegi fyrir því. Ég er minn versti óvinur og ég veit það.“

2. Þegar Rihanna opnaði sig um ofbeldisfullt samband við Chris Brown

Söngkonan Rihanna, oftar en ekki kölluð Riri, átti tilfinningaþrungna stund í viðtali við Opruh sem hún fór í á síðasta ári. Hún brotnaði niður þegar hún talaði um samband sitt við Chris Brown. Söngkonan sem hafði áður verið orðfá um árásina sem hún varð fyrir af hendi þáverandi kærasta síns, í febrúar 2009, rauf loksins þögnina. Hún sagðist upplifa „reiði, særindi og svik. Þetta var niðurlægjandi. Ég missti besta vin minn.“

3. Þegar Lanca Armstrong viðurkenndi svindlið

Í janúar 2013 viðurkenndi hjólreiðamaðurinn við Opruh að hafa notað ólögleg lyf á ferlinum. Hann viðurkenndi að ferill hans væri byggður á „stórri lygi sem ég endurtók.“ Hann viðurkenndi einnig að hafa lagt aðra í einelti og kallaði sjálfan sig „hálfvita en mannvin.“ Í kjölfarið missti hann alla sjö meistaratitla sína í Tour de France og varð auk þess að skila bronsverðlaunum sínum frá Ólympíuleikunum í Sydney árið 2000.

4. Þegar Michael Jackson ræddi um lýtaaðgerðirnar í fyrsta sinn

Árið 1993 fór Micheal Jackson með Opruh í túr um Neverland-búgarðinn hans. Yfir 100 milljónir horfðu á viðtalið, en Elizabeth Taylor kom sem gestur í þáttinn. Hann opnaði sig með breytinguna á húðlit sínum, listamannaeðlið og slúðursögurnar. „Ég er með húðsjúkdóm sem eyðir litarefnum í húðinni, ég get ekkert að því gert. Ókei?“ lét hann hafa eftir sér. „En, þegar fólk býr til sögur um mig um að ég vilji ekki vera sá sem ég er, það særir mig... Það er vandamál í mínu lífi, ég get ekki stjórnað því.“

5. Og þegar Tom Cruise hoppaði á sófanum

Hver getur gleymt stundinni þegar Hollywood-leikarinn lýsti yfir ást sinni á Katie Holmes, með því að hoppa á sófanum hjá Opruh, árið 2005?

Myndbandið fór sem eldur í sinu um netheima, og er af mörgum talin stundin þegar almenningsálit á Cruise hóf að breytast.

Tom og Katie eru hætt saman, en þessari yfirlýsingu verður seint gleymt.