Damir fyllir í skarð Sverris Inga hjá Blikum

Miðvörðurinn Damir Muminovic hefur skrifað undir þriggja ára samning við Breiðablik og mun því spila áfram í Pepsi-deild karla næsta sumar. Muminovic lék með með Víkingi Ólafsvík í sumar en liðið féll úr deildinni. Þetta kemur fram í fréttatilkynningu frá Breiðabliki.

Breiðablik var búið að ná samkomulagi við Víking Ólafsvík um vistaskipti leikmannsins en honum er meðal annars ætlað að fylla í skarð Sverris Inga Ingasonar sem var seldur til norska félagsins Viking FK í gær.

„Damir er fæddur árið 1990 og var lykilleikmaður í liði Víkings á síðustu leiktíð. Damir lék í hjarta varnarinnar en getur einnig leyst fleiri stöður," segir í fréttatilkynningunni frá Blikum.

Damir hefur líka leikið með HK, Hvöt, Leikni Breiðholti á sínum ferli en hann var bara búinn að vera í Ólafsvík í eitt tímabil.