Jóhannes: Bjarni veit alveg hvað hann er að gera

„Þetta var ekki erfið ákvörðun. Þegar maður fær tækifæri til þess að vinna með bróður sínum þá hugsar maður sig vel um," segir Jóhannes Karl Guðjónsson en hann skrifaði í morgun undir tveggja ára samning við Fram.

Þar verður hann undir stjórn bróður síns, Bjarna Guðjónssonar.

"Bjarni kynnti þetta verkefni fyrir mér sem þjálfari og mér leist mjög vel á þetta. Það er mikil hreinsun búin að eiga sér stað hérna og fólki leist kannski ekki vel á þetta til að byrja með. Bjarni vissi samt nákvæmlega hvað hann væri að gera. Hann vissi að þessi hreinsun yrði að eiga sér stað."

Jóhannes segist spenntur fyrir því að vinna með bróður sínum og hefur lofað því að hlýða þjálfaranum.

"Það gefst ekki oft svona tækifæri á ferlinum. Við hættum að rífast að stóru leyti er við komum úr barnaskóla."