Kristinn Ingi með þrennu í fyrsta leiknum með Val

Kristinn Ingi Halldórsson byrjar vel í Valsbúningnum en þessi eldfljóti framherji hoppaði yfir lækinn í vetur og skipti úr Fram yfir í Val.Kristinn Ingi skoraði þrennu í 5-1 sigri á Grindavík í æfingaleik í Egilshöllinni á dögunum en þetta kom fram á heimasíðu Valsmanna.

Magnús Björgvinsson kom Grindavík í 1-0 í fyrri hálfleiknum en Haukur Páll Sigurðsson jafnaði fyrir hálfleik.Kristinn Ingi skoraði öll þrjú mörkin sín í seinni hálfleiknum en lokamark leiksins skoraði síðan Kristinn Freyr Sigurðsson.

Kristinn Ingi Halldórsson er 24 ára gamall en hann skrifaði undir samning til ársins 2017. Kristinn Ingi skoraði 2 mörk í 19 leikjum með Fram í Pepsi-deildinni í sumar en byrjaði bara 8 leiki. Hann skoraði 11 mörk í 19 leikjum sumarið á undan.