Fuglahús og flögg fjarlægð af Hofsvallagötu

Framkvæmdir eru fyrirhugaðar á Hofsvallagötu, þar sem unnið verður samkvæmt tillögum sem gerðar voru í samráði við íbúa í Vesturbæ. Þetta kemur fram í frétt á vef Reykjavíkurborgar.

Bílastæðum verður fjölgað að vestanverðu, fuglahús og flögg tekin niður, eyja að austanverðu verður tekin í burt og miðlína löguð að norðanverðu. Framkvæmdir munu standa yfir í desember og ert er ráð fyrir að þær taki 4-6 vinnudaga.

Breytingarnar er hægt að sjá hér.

Miklar deilur hafa verið uppi um framkvæmdir á Hofsvallagötu um mánaðaskeið og íbúar hafa verið mjög óánægðir með þær breytingar sem gerðar hafa verið.

„Aðalskipulag Reykjavíkur 2010-2030 leggur áherslu  á vistvæna ferðamáta. Þar er Hofsvallagata skilgreind sem borgargata, þ.e. lykilgata hverfisins þar sem helstu þjónustukjarnar og stofnanir eru til húsa. Heitið vísar til hinnar hefðbundnu götu í þéttri byggð þar sem húsið, gatan og opna rýmið mynda órofa heild og er gert ráð fyrir að viðkomandi götur þróist sem fjölbreytileg almenningsrými. Borgargötur skulu njóta forgangs þegar kemur að endurhönnun og fegrun gatna,“ segir í frétt Reykjavíkurborgar.