Hólmbert semur við Celtic

Gengið verður formlega frá sölu sóknarmannsins Hólmberts Arons Friðjónssonar til skoska félagsins Celtic nú síðar í dag.

Þetta staðfesti Sverrir Einarsson, formaður knattspyrnudeildar Fram, í samtali við Vísi í dag.

„Það er verið að lesa yfir síðustu blaðsíður samningsins og vonandi verður gengið frá þessu innan stundar. Það er auðvitað ekkert frágengið fyrr en blekið er komið á pappírinn,“ sagði Sverrir.

Hólmbert mun líklega skrifa sjálfur undir samning síðar í vikunni og hægt verður að ganga formlega frá félagaskiptunum þegar opnað verður fyrir félagaskipti í Evrópu um áramótin.

Hólmbert Aron varð markahæsti leikmaður Fram í Pepsi-deildinni í sumar með tíu mörk. Hann gekk í raðir félagsins frá HK árið 2011.