Ásgeir Börkur æfir með Fram

Knattspyrnumaðurinn Ásgeir Börkur Ásgeirsson, æfði í gær með Fram í Safamýrinni.

Bjarni Guðjónsson, nýráðinn þjálfari liðsins, stjórnaði æfingunni í gær en hann hefur fengið fjöldann allan af leikmönnum til liðsins að undanförnu.

„Ásgeir býr rétt hjá Framheimilinu og fékk að koma á æfingu hjá okkur. Hann er samningslaus og er að reyna koma sér að hjá liðum erlendis,“ sagði Bjarni Guðjónsson í samtali við RÚV í gær.

„Hann er vissulega frábær leikmaður og myndi styrkja liðið gríðarlega, við reynum alltaf að fá góða leikmenn til liðs við okkur.“

Ásgeir Börkur lék með norska liðinu Sarpsborg á síðasta tímabili þar sem hann var á láni frá Fylki. Hann kom síðan heim í Árbæinn í sumar og gjörbreytti leik liðsins með komunni í sitt uppeldisfélag.