Halda „svikum“ fyrri stjórnar um raforkuskatt

Raforkuskattur verður áfram innheimtur á næsta ári samkvæmt frumvarpi til fjárlaga þrátt fyrir harða gagnrýni leiðtoga núverandi ríkisstjórnarflokka á ákvörðun um að framlengja hann í desember 2012.

Sigmundur Davíð Gunnlaugsson, forsætisráðherra, sagði í ræðu á Alþingi þann 6. desember 2012, þá óbreyttur stjórnarandstöðuþingmaður, að framlengingin sýndi „ósvífni“ þáverandi ríkisstjórnar Samfylkingar og Vinstri hreyfingarinnar – græns framboðs.

„Vonandi verður skaðinn ekki langvarandi, vonandi tekst nýrri ríkisstjórn fljótt að sýna fram á að hún haldi loforð og samninga betur en sú sem ég vona að fari frá næsta vor,“ sagði Sigmundur.

Bjarni Benediktsson, fjármála- og efnahagsráðherra, gagnrýndi ákvörðunina einnig í ræðu á Alþingi þann 3. desember sama ár.

„Svikin loforð á borð við þetta eru, ásamt öðru, til þess fallin að fæla menn frá því að koma með fjármagn til Íslands,“ sagði Bjarni

Samkvæmt fjárlagafrumvarpi ríkisstjórnarinnar verður þessi framlenging, sem ráðherrarnir gagnrýndu, látin standa til ársins 2015. Stóriðjufyrirtækin þurfa því að greiða um 1,7 milljarða króna í skatt vegna raforkukaupa á næsta ári.

Framlengingin gekk þvert á skriflegt samkomulag fyrrverandi iðnaðar- og fjármálaráðherra við stóriðjufyrirtækin árið 2009 og skriflega yfirlýsingu, sem Steingrímur J. Sigfússon, þáverandi fjármálaráðherra, sendi Alcan á Íslandi í júní 2010. Sú yfirlýsing var forsenda þess að Rio Tinto Alcan réðist í 60 milljarða fjárfestingarverkefni í Straumsvík.

Rannveig Rist, forstjóri Rio Tinto Alcan á Íslandi, hefur ásamt öðrum forsvarsmönnum álfyrirtækja á Íslandi gagnrýnt framlengingu skattsins.

„Það er sárt að borga áfram um eina milljón króna á dag í raforkuskatt sem átti að vera tímabundinn og þurfa á sama tíma að segja fólki upp vegna sparnaðar,“ segir Rannveig.