Garner spilar sitt tíunda sumar í Eyjum og gott betur

Matt Garner, vinstri bakvörður ÍBV, mun spila áfram í Vestmannaeyjum en þessi 29 ára Englendingur er búinn að skrifa undir nýjan þriggja ára samning eins og fram kemur á vefsíðu Eyjafrétta.

„Garner var með lausan samning og höfðu nokkur lið í úrvalsdeild falast eftir kröftum þessa sterka bakvarðar en hann skrifaði undir þriggja ára samning við ÍBV," segir í fréttinni á eyjafrettir.is.

Garner kom fyrst á láni til ÍBV frá Crewe árið 2004 en hefur verið með ÍBV frá og með sumrinu 2006. Hann á að baki 132 leiki með ÍBV í efstu deild og er fyrsti erlendi leikmaðurinn sem nær því að spila yfir hundrað úrvalsdeildarleiki með félaginu.

Garner mun spila sitt tíunda tímabil í Eyjum næsta sumar en hann lék einnig með félaginu í 1. deildinni sumrin 2007 og 2008.

Matt Garner lék 21 leik með ÍBV í Pepsi-deildinni 2013. Hann skoraði ekki en átti þrjár stoðsendingar og átti þátt í undirbúningi fimm marka til viðbótar.