Gagnrýnir boðaðar breytingar á rammaáætlun

Breytingar á rammaáætlun um vernd og nýtingu náttúruauðlinda er á málefnaskrá ríkisstjórnarinnar fyrir næsta vorþing. Verkefnisstjórn hefur þegar hafið störf og er áætlað að hún skili tillögum 15. febrúar á næsta ári.

Bæði framsóknar- og sjálfstæðismenn lýstu því yfir á síðasta kjörtímabili að þeir vilji gera breytingar á rammáætlun. Um er að ræða átta virkjunarkosti sem nú eru í biðflokki. Þrír í Þjórsá, Skrokkölduvirkjun í Köldukvísl, tveir áfangar í Hágönguvirkjun og svo Hólmsá og Hagavatn.

Katrín Jakobsdóttir, formaður Vinstri grænna, segir að á fundi umhverfisnefndar Alþingis í vikunni hafi verið upplýst að ráðherra hyggist leggja fram tillögur að breytingum á næsta vorþingi. Katrín er gestur i þættinum Pólitíkin á vísir.is.

„Við höfum alltaf lagt áherslu á það í minni hreyfingu að rammaáætlun sé þessi vettvangur þar sem hægt er að ná sátt um verndun og nýtingu. Það þýðir að rammaáætlunin sem var samþykkt á þinginu er ekki endilega draumaáætlun mín. Ég sé ekki þá þörf að virkja öll þau svæði sem þar eru sett í nýtingarflokk og hefði viljað sjá miklu meira fara upp í verndarflokk. Þetta var málamiðlum. Ég hefði viljað sjá meiri frið um vinnulag og að menn væru ekki að ýta eftir því að fá fleiri kosti inn í nýtingarflokk sem væntanlega knýr þennan hraða sem nú er búið að setja í þessa vinnu. Ástæðan fyrir þvi´að kostir eru settir í biðflokk er að það skortir rannsóknir. Og nú horfum við upp á að það hafa ekki einu sinni verið skipaðir nýir faghópra. Það á eftir að ljúka rannsóknum til að hægt sé að taka endanlega ákvörðun þannig að ég hef miklar áhyggur af því að þetta náist bara ekki,“ segir Katrín.