Segir kynjafræðinga hafa svínbeygt forráðamenn Háskólans

Jón Baldvin Hannibalsson ætlar í mál við Háskóla Íslands. Forráðamenn HÍ fá falleinkunn hjá Jóni sem segir þá ljúga til um hvernig í málum liggur til að koma sér undan ábyrgð.

Í grein sem birtist í Fréttablaðinu í dag kemur fram að hann vilji láta á það reyna hvort dómstóll götunnar komist framvegis upp með að ráða gangi mála við háskólann. Eða hvort standa beri vörð um réttarríkið og grundvallarmannréttindi.

Í greininni rekur Jón Baldvin málin eins og þau horfða við sér, "hinar raunverulegu ástæður", aðdraganda þess að fallið var frá því að ráða hann sem kennara við stjórnmáladeild skólans. Forráðamenn Háskóla Íslands fá ekki háa einkunn hjá Jóni Baldvin og segir hann framgöngu þeirra  einkennast af ráðaleysi og því að vilja koma sér undan ábyrgð með "eftiráspuna". Alvarleg hlýtur að teljast ásökun hans um að þeir hreinlega ljúgi til um hvernig í málinu liggur og viljað koma ábyrgðinni yfir á Baldur Þórhallsson prófessor.

Fyrst var Jóni Baldvin tilkynnt að kennarar við kynjafræði hafi skriflega mótmælt ráðningu hans. Þetta var að mánudegi 26. ágúst. Stjórn deildarinnar hafði setið maraþonfundi og hlustað á óhróður um persónu Jóns, eins og Jón Baldvin leggur málið upp, en þeir hjá Háskólanum fullvissuðu Jón Baldvin engu að síður um að þeir ætluðu ekki að láta kúga sig.

Strax næsta dag kvað við annan tón, þá tjáðu ráðamenn Jóni að þeir hefðu misst alla stjórn á umræðunni því að heiftin og ofstækið kynnu sér engin takmörk. Þeir væru að niðurlotum komnir. "Þeim þætti miður að hafa tælt mig inn í þennan ormagarð. Þeir spurðust fyrir um hvort mér væri ekki fyrir bestu að draga mig til baka. Það myndi um leið létta þungum krossi af þeirra herðum," segir í grein Jóns Baldvins, sem lesa má í heild sinni í Fréttablaðinu og á hér á Vísi.