Netvæðing heilbrigðiskerfisins það sem koma skal

Vefsíða sem býður upp á hugræna atferlismeðferð við svefnvandamálum í gegnum internetið hefur fengið frábærar viðtökur. Læknir, sem lærir nú forritun, segir netvæðingu heilbrigðiskerfisins það sem koma skal.

Sálfræðingurinn Erla Björnsdóttir, og læknarnir og forritararnir Steindór Oddur Ellertsson og Gunnar Jóhannson, opnuðu vefsíðuna Betri svefn í júlí síðastliðinum, en þar gefst fólki kostur á að taka á svefnvandamálum í gengum veraldarvefinn.

Lausnir við svefnvandamálum hafa verið af skornum skammti hingað til og nær einskorðast við svefnlyf. Íslendingar eiga norðurlandamet í svefnlyfjanotkun og hefur notkunin aukist stöðugt síðustu ár.

„Læknar hafa hingað til ekki haft nein úrræði í þessum efnum önnur en að skrifa upp á svefnlyf fyrir fólk, en menn þurfa að gera sér grein fyrir að svefnlyf eru hugsuð sem skyndilausn til nokkurra vikna. Aftur á móti eru dæmi um fólk á Íslandi sem hefur notað þessi lyf svo árum og jafnvel áratugum skiptir. Það getur haft mjög slæmar afleyðingar og margir ánetjast lyfjunum,“ segir Erla.

Erla segir að meðferð með fagaðila í gegnum netið sé ódýr og árangursríkur kostur sem þarf ekki að vera háður búsetu fólks. Áhrif meðferðarinnar eru langvarandi og bæta svefn hjá 80-90% skjólstæðinga.

10 - 15% fullorðina á Íslandi eiga við langvarandi svefnvandamál að stríða. Rannsóknir hafa sýnt fram á að hugræn atferlismeðferð með fagaðila í gegnum internetið skilar jafn góðum árangri og meðferð með sálfræðingi á stofu. 

Samstarfsmenn Erlu, þeir Steindór og Gunnar, eru læknar og áhugaforritarar, en Steindór skráði sig í fullt nám í forritun við HR í haust. Þeir segja að kreppan hafi ýtt læknum útí að nota tæknina meira, og  eru þeirrar skoðunar að hægt sé að spara mikla peninga og tíma með því að nota veraldarvefinn til bæði meðferða og forvarna. Þeir segja marga lækna vera í þessum hugleiðingum.

„Hingað til hefur þetta verið vannýttur möguleiki. Það er hægt að auka eftirfylgd án þess að fólk þurfi að fara í tíma til sérfræðinga sem kosta stórfé. Þá er þetta einnig frábær leið til forvarna, en hægt er að koma í veg fyrir sjúkdóma með fræðslu og leiðbeiningum í gegnum til dæmis snjallsímaforrit,“ segja þeir.