Breytingar á varnaðarmerkjum

Aðferðarfræði við hættumat efna hefur verið umturnað á undanförnum árum. Nú er ábyrgð á áhættumati á hendi framleiðenda og innflytjenda en ekki stjórnvalda eins og áður var.

Sú breyting sem almennir notendur munu helst taka eftir er ný varnaðarmerki. Flestir þekkja appelsínugulu varnaðarmerkin á umbúðum hættulegra efna. Þau munu víkja fyrir rauðum tígli utan um mynd sem gefur til kynna hvaða hætta er á ferð.

Framleiðendur þurfa að huga að endurnýjun á merkingum en gömlu merkin eiga að vera horfin úr hillunum um mitt ár 2017. Nýja kerfið er samræmt milli Evrópu, Bandaríkjanna og fleiri ríkja. Sá sem markaðssetur hættuleg efni skal tryggja að umbúðir séu merktar á íslensku en söluaðili ber einnig ábyrgð því óheimilt er að selja vanmerktar vörur.

Löggjöfin um efnavörur hefur breyst mikið undanfarin ár. Árið 2008 var gerð sú breyting að færa ábyrgðina yfir á framleiðendur og innflytjendur.

„Þetta er auðvitað mjög mikil breyting, en fram til þessa hafa þessar skráningar legið meira á stærri framleiðendum. Breytingarnar eru að skila sér, þannig að þeir sem eru að flytja efnin inn og selja vöruna eru að alltaf að sjá þessar breytingar í mun meiri mæli. Upplýisngar um efnin eru orðnar mun ítarlegri,“ segir Bryndís Skúladóttir hjá Samtökum Iðnaðarins.

Í síðustu viku var haldinn fundur Samtaka iðnaðarins, Samtaka verslunar og þjónustu og Umhverfisstofnunar þar sem rætt var rætt um upplýsingagjöf um efnavörur og skyldur þeirra sem framleiða, flytja inn eða selja efni.

Á fundunum var rætt um mikilvægi þess að upplýsingar fari á milli framleiðeinda, byrgja og söluaðila og notenda, að það sé gott flæði á upplýsingum.

Á fundinum voru ræddar reglugerðir sem er verið að setja á grundvelli nýrra laga og fjallað um breytingar á merkjum. Þar var einnig fjallað um þær breytingar sem verða á skráningu og markaðssetningu á snyrtivörum og sæfiefnum, sem eru til dæmis viðarvörn, sótthreinsandi og þess háttar efni.