„Brettum upp ermar“ - Blóðbankinn þarf 2000 nýja blóðgjafa

Blóðbankinn hefur ýtt átakinu „Brettum upp ermar - gefum blóð" úr vör. Þar eru landsmenn hvattir til þess að gefa blóð enda þarf Blóðbankinn á um 2000 nýjum blóðgjöfum á ári til að viðhalda blóðgjafahópnum.

Um 9000 þúsund manns eru í blóðgjafahópnum í dag en þeir koma um 14 þúsund sinnum á ári í Blóðbankanna.

Samkomulag um átakið var formfest í húsakynnum Marel í Garðabæ í morgun. Fyrirtækið tók höndum saman við Blóðbankann til að vekja athygli á verkefninu en einnig munu félögin Já og Rio Tinto Alcan leggja hönd á plóg ásamt Samtökum atvinnulífsins.

Forstjórar félaganna voru við samþykktina í morgun en þar var einnig Skúli Eggert Sigurz, framkvæmdastjóri lögfræðistofunnar Lagastoðar. Skúli varð fyrir fólskulegri líkamsárás í mars á síðasta ári.

Það má segja að Blóðbankinn hafi reynst Skúla dýrmætur enda þurfti hann á hátt í fimmtíu lítrum af blóði að halda eftir árásina.