Blatter býst við að HM 2022 verði spilað um vetur

Sepp Blatter, forseti alþjóða knattspyrnusambandsins, FIFA, býst fastlega við því að framkvæmdanefnd FIFA muni samþykkja á fundi í byrjun október að færa HM 2022 frá sumri yfir á vetur.

"Ég yrði mjög hissa ef framkvæmdanefndin breytir þessu ekki því það er ekki hægt að spila um sumar í Katar. Hvað við gerum í kjölfarið verður ákveðið síðar," sagði Blatter.

Það verður mikil og mjög erfið vinna að færa heimsmeistaramótið því flestar deildarkeppnir heims fara fram á veturna.

Blatter lagði upprunalega til að mótið færi fram í nóvember en nú er verið að ræða um að halda mótið í maí. Langt er þó í að nokkuð verði ákveðið í þeim efnum.