Hólmbert Aron: Hafði aldrei unnið neitt í lífinu

„Tilfinning er ógeðslega góð og ég get eiginlega ekki lýst henni," sagði Hólmbert Aron Friðjónsson í viðtali við Arnar Björnsson í beinni útsendingu Stöðvar 2 Sport frá bikarúrslitaleik Fram og Stjörnunnar. Fram vann bikarinn í vítakeppni og Hólmbert skoraði bæði í leiknum og í vítakeppninni.

„Við vorum náttúrulega 0-2 undir í hálfleik, misstum kannski ekki trúna en þetta var erfitt. Við náðum að koma til baka sem mér finnst glæsilegt og ég er svo stoltur af liðinu að hafa náð að vinna þennan leik," sagði Hólmbert Aron.

„Við erum búnir að æfa vel. Við höfum alltaf trú á þessu og gáfum okkur alla í þennan leik. Ég hef aldrei unnið neitt í lífinu og það er geðveikt að gera það hérna í meistaraflokki," sagði Hólmbert Aron í sigurvímu.