Klopp reyndi við Kagawa

Jürgen Klopp, þjálfari Borussia Dortmund, viðurkennir að hafa gert tilraun til þess að fá Japanann Shinji Kagawa aftur til Þýskalands frá Manchester United.

Kagawa átti nokkuð erfitt uppdráttar á sínu fyrsta tímabili hjá Manchester þótt birt hafi til inni á milli. Hann var töluvert þjakaður af meiðslum og átti erfitt með að vinna sér inn sæti í byrjunarliðinu.

Kagawa hefur verið orðaður við endurkomu til Dortmund þaðan sem hann var keyptur til Englandsmeistaranna síðastliðið sumar. Klopp staðfestir við Sky Deutschland að Kagawa vilji vera um kyrrt á Englandi.

„Það varð ljóst nokkuð snemma. Shinji vill vera áfram þetta tímabil hjá Manchester. Ég átti ekki von á öðru svari en maður tapar engu á því að spyrja," sagði Klopp.