Ákveða framtíð rannsóknar efnahagsbrota

Unnið er að því að finna lausn á framtíðarskipan rannsóknar efnahagsbrota í landinu. Meðal þess sem verið er að skoða er ný stofnun að norskri fyrirmynd sem tæki við af  embætti sérstaks saksóknara þegar sú stofnun líður undir lok.

Samkvæmt lögum um embætti sérstaks saksóknara gat innanríkisráðherra eftir 1. janúar á þessu ári lagt til að embættið yrði lagt niður að fengnu áliti ríkissaksóknara, en ráðherra hefði samt þurft að leggja fram lagafrumvarp þess efnis.

Til stendur að embætti sérstaks saksóknara starfi út næsta ár og hefur það í raun fjármuni til þess. Það veltur hins vegar á fjárlögum næsta árs, sem lögð verða fram í haust, hversu mikið fjármagn embættið fær til ráðstöfunar á árinu 2014 en embættið á jafnframt ónýttar fjárheimildir sem flytjast mili ára.

Embættið á því að starfa út árið 2014 en hvert fyrirkomulag rannsóknar efnahagsbrota verður eftir það liggur ekki fyrir.

Sérstök nefnd á vegum innanríkisráðuneytisins skipuð þeim Bryndísi Kristjánsdóttur, skattrannsóknarstjóra, Gunnlaugi Geirssyni, lögfræðingi í ráðuneytinu og Sigurði Tómasi Magnússyni, fyrrverandi héraðsdómara, hefur undanfarið ár unnið að tillögum um framtíðarskipan rannsóknar efnahagsbrota. Sigurður Tómas er formaður nefndarinnar.

Samkvæmt heimildum fréttastofu hefur nefndin meðal annars skoðað hvort fýsilegt sé að leggja til sérstaka stofnun efnahagsbrota og hefur verið horft til Økokrim í Noregi í því samhengi. Økokrim sem hefur verið starfrækt með góðum árangri frá árinu 1989. Í raun gæti þessi nýja stofnun tekið við af embætti sérstaks saksóknara og þyrfti ekki annað en einfalda lagabreytingu til þar sem embætti sérstaks saksóknara er svipað upp byggt og Økokrim. Samkvæmt upplýsingum fréttastofu hafa jafnframt verið skoðaðir kostir þess að færa verkefni skattrannsóknarstjóra til hinnar nýju stofnunar, ef hún verður að veruleika, en hvaða leið verður farin er á endanum ákvörðun ráðherra.

Þess skal getið að þetta fyrirkomulag með rannsókn skattalagabrota er til staðar hjá bæði Ekobrottsmyndigheten í Svíþjóð og Økokrim í Noregi.

Samkvæmt upplýsingum fréttastofu er vinna nefndarinnar langt komin og á hún að skila tillögum til innanríkisráðherra í lok ágúst næstkomandi.