Talibani biðst afsökunar

Adnan Rashíd, yfirmaður talibanahreyfingarinnar í Pakistan, hefur sent Malölu Júsafsaí bréf þar sem beðist er afsökunar á skotárásinni á hana á síðasta ári.

Í bréfinu segist hann frekar hafa viljað að hún yrði vöruð við því að halda áfram að gagnrýna talibana.

Hann segir ekki að það hafi verið rangt að ráðast á hana, einungis að sér þyki það hræðilegt og vildi að það hefði ekki gerst. Hann tekur einnig fram að í bréfinu sé hann einungis að tjá sína eigin skoðun, en ekki að tala fyrir munn hreyfingarinnar.

Malala var fimmtán ára þegar hún var skotin í höfuðið þegar hún var á leiðinni heim úr skólanum í þorpi sínu í Pakistan. Hún var skömmu síðar flutt á sjúkrahús í Bretlandi, þar sem hún býr enn og hefur náð heilsu.

Fréttastofan AP hefur fengið afrit af bréfinu og rætt við annan yfirmann í talibanahreyfingunni, sem staðfestir að bréfið sé ekki falsað.

Árásin á Malölu vakti hörð viðbrögð, jafnt í Pakistan sem um heim allan. Sameinuðu þjóðirnar hafa gert afmælisdag hennar, 12. júlí, að alþjóðlegum degi nefndum í höfuðið á henni.