Leita að besta tölvuforriti Íslands

Prófessor við Háskóla Íslands stendur nú í ströngu við að velja bestu tölvuforrit Íslands. Tilefnið er alþjóðleg samkeppni Sameinuðu Þjóðanna. Hann segir að íslensk nýsköpun sé einstök á heimsmælikvarða.

World Summit Award samkeppnin er haldin annað hvert ár og það á vegum Sameinuðu Þjóðanna. Samkeppnin er eins konar Ólympíuleikar upplýsingatækninnar enda er hér leitað að lausnum sem nýst geta fólki um allan heim.

Keppt er í átta flokkum en hvert þátttökuland tilnefnir einn fulltrúa í hvern flokk en þeir munu halda til Srí Lanka á ráðstefnuna miklu í október.

Jóhann Pétur Malmquist, prófessor í tölvunarfræði við Háskóla Íslands, skipar íslensku valnefndina. Síðustu vikur hefur hann vaðið í gegnum hinn stafræna frumskóg Íslands, í leit af gersemum sem vænlegar eru til vinnings. Sjálf verðlaunin eru í formi kynningar.

„Appið verður að vera vandað," segir Jóhann Pétur. „Þarna eigum við frá litla Íslandi smá séns og þó svo að við komum frá litlu landi þá eru sömu atriði í upplýsingatækninni unnin hér eins og annars staðar."

Jóhann bendir á að hin íslenska nýsköpun sé einstök. Hér sé afar auðvelt fyrir fólk með ólíka þekkingu að koma saman. Í þokkabót er íslenski markaðurinn hentugur sem prufukeyrsla fyrir hinn stóra alþjóðlega markað.

„Ef við getum komið með lausnir sem henta Íslandi vel, þá er mjög líklegt að hún eigi vel við stóru löndin. Og ef við vöndum okkur, gerum þetta vel og fallegt, þá getum við slegið í gegn."

Upplýsingasamfélagið hefur tekið gríðarlegum breytingum á síðustu árum. Talið er að rúmlega milljarður snjallsíma sé nú í umferð. Markaðurinn er því risavaxinn og gróðamöguleikarnir sömuleiðis.

„Ef þú gerir hlutina vel og færð athygli, hver veit? Kannski getum loks unnið á þessari snjóhengju," segir Jóhann Pétur að lokum.