Heimilisvinur ásakaður um kynferðisbrot gegn systrum

Héraðsdómur Vesturlands úrskurðaði í gær karlmann í áframhaldandi farbann til 19. september vegna rökstudds gruns um kynferðisafbrot. Maðurinn er grunaður um að hafa beitt systur ítrekuðu kynferðisofbeldi.

Sýslumaðurinn á Akranesi óskaði eftir farbanninu þar til rannsókn og niðurstaða í málinu liggur fyrir en Hæstiréttur hafði áður úrskurðað manninn í farbann fyrr á árinu.

Maðurinn er talinn hafa brotið ítrekað gegn tveimur stúlkum frá árunum 2007 til 2012, en stúlkurnar eru systur.

Maðurinn var heimilisvinur og dvaldi langdvölum á heimili systranna. Hann flutti svefnstað sinn úr setustofu í herbergi annarrar systurinnar, þar sem hann deildi rúmi með stúlkunni með fullri vitund móður hennar.

Í úrskurðinum segir að krafan um farbann sé gerð í þeim tilgangi að tryggja nærveru mannsins á landinu þar sem hann liggur undir rökstuddum grun.

Í úrskurði Héraðsdóms Vesturlands segir að maðurinn sé erlendur ríkisborgari og að hann hafi takmörkuð tengsl við landið. Krafan um úrskurð um farbann er sögð gerð í þeim tilgangi að tryggja nærveru hans á landinu þar sem maðurinn liggi fyrir rökstuddum grun um að hafa brotið gegn systrunum sem varðað geti fangelsisrefsingu.

Talið er að veruleg hætta sé á að maðurinn muni reyna að yfirgefa Ísland í þeim tilgangi að koma sér með einum eða örðum hætti undan rannsókn, málsókn eða refsingu.