Framsókn myndi missa 5 þingmenn

Allir flokkar á þingi nema Framsóknarflokkurinn bæta við fylgi sitt frá alþingiskosningum í skoðanakönnun Fréttablaðsins og Stöðvar 2.

Könnunin varð gerð dagana 26. og 27. júní. Úrtakið í könnuninni var 1.077, en hringt var þar til náðist í 800 manns samkvæmt lagskiptu úrtaki. Alls tók 81% svarenda afstöðu til spurningarinnar

Hvaða lista myndir þú kjósa ef gengið yrði til þingkosninga í dag?

Það sem einkennir niðurstöður könnunarinnar er meðal annars það að fylgi við önnur framboð en þau sem komust inn á þing dalar verulega. Á meðan tæp tólf prósent kusu framboð sem ekki komust upp fyrir fimm prósenta þröskuldinn sem tryggir þingsæti segjast nú aðeins 4,2% svarenda myndu kjósa önnur framboð en þau sex sem eiga fulltrúa á þingi.

Ekki liggur fyrir hvernig fylgið hefur færst milli flokka en Framsóknarflokkurinn er eini flokkurinn á þingi sem er undir kjörfylgi.

Framsókn fengi nú 21% atkvæða og myndi missa fimm af nítján þingmönnum. Sjálfstæðisflokkurinn fengi 31,3% og bætti við sig tveimur þingmönnum. Stjórnin hefði því enn ríflegan meirihluta á þingi, 35 þingmenn gegn 28.

Athygli vekur að Vinstri græn fara upp í 15,3% og bæta við sig tveimur þingmönnum. Þau eru því komin upp fyrir Samfylkinguna, sem bætir einungis lítillega við sig frá kosningum og stendur nú í 14,4% og bætir við sig einum þingmanni.

Fylgi Pírata og Bjartrar framtíðar stendur hér um bil í stað en síðarnefndi flokkurinn missir þó einn af sex þingmönnum sínum.

Meiri stuðningur á landsbyggðinni

Ríkisstjórnin nýtur stuðnings tæplega 60% þeirra kjósenda sem taka afstöðu samkvæmt könnuninni.