Blóðniðurstöður í samræmi við grun lögreglu

Niðurstöður úr DNA rannsókn á blóðsýnum í morðmáli á Egilsstöðum eru komnar til landsins. Yfirlögregluþjónninn Jónas Wilhelmsson segir niðurstöðurnar í samræmi við grun lögreglu.

Það var í byrjun maí síðastliðinn sem er 25 ára gamall karlmaður, ónáðaði íbúa í fjölbýlishúsi á Egilsstöðum. Hann á að hafa verið drukkinn og sníkt sígarettur af íbúum.

Að lokum var lögreglan á Egilsstöðum kölluð til sem kom á vettvang og ræddi við manninn.

Ekki þótti ástæða til þess að handtaka hann á þeim tímapunkti. Um morguninn tilkynnti nágranni til lögreglu að Karl Jónsson væri látinn í íbúð sinni. Þá þegar var ljóst að andlát Karls bar að með voveiflegum hætti, en hann var tæplega sextugur þegar hann lést.

Málið er búið að vera í rannsókn í tæpa tvo mánuði, þannig þurfti að senda sýni til Svíþjóðar til rannsóknar. Nú hyggst lögreglan yfirheyra hinn grunaða í næstu viku, þá verða niðurstöðurnar kynntar fyrir honum. Hann hvorki neitar né játar sök.

Yfirlögregluþjónn vonast til þess að geta sent málið til ákæruvaldsins sem fyrst.