Halda meirihlutanum í gíslingu með málþófi

Önnur umræða um frumvarp ríkistjórnarinnar um veiðigjöld hefur staðið í allan dag á Alþingi. Þingmenn stjórnaranstöðunnar ætla sér að halda uppi málþófi þangað til forsetinn kemur til landsins.

Heitar umræður hófust á Alþingi klukkan þrjú í dag og standa enn. Hátt í 35 þúsund undirskriftir hafa safnast þar sem fólk skorar á Alþingi að samþykkja ekki lög um lækkun veiðigjalda. Verði þau samþykkt er forseti Íslands hvattur til að synja þeim til staðfestingar og vísa þeim til þjóðarinnar.

Birgitta Jónsdóttir, formaður Pírata las upp ljóð í ræðu sinni í kvöld. Þar skoraði hún á forsetann að gefa upp hvenær hann kæmi til landsins. „Ég vil ekki taka áhættuna á að það verði handhafar forsetavalds sem staðfesta veiðigjaldslögin,“ sagði hún meðal annars í ræðunni, en Píratar boðuðu málþóf til að tryggja að lögin verði ekki samþykkt af handhöfum forsetavalds á meðan hann er erlendis.

Smári McCarthy, Pírati, segir á facebook-síðu sinni í kvöld að markmiðið væri ekki að tefja störf þingsins út í hið óendanlega heldur eingöngu til að gefa forseta landsins tíma til að komast heim til Íslands til að sinna skyldu sinni. Smári segir jafnframt að það virðist aldrei þessu vant vera leyndarmál í þágu þjóðaröryggis hvenær forsetinn kemur heim. Því gæti málþófið staðið yfir frá nokkrum klukkutímum og upp í nokkrar vikur, það fari allt eftir því hvar hann sé.

Samkvæmt heimildum sem voru að berast fréttasofu Vísis rétt í þessu er forsetinn kominn til landsins. Hvort málþófið haldi áfram gat Birgitta ekki tjáð sig um.