Töluvert meiri umferð um hringveginn

Umferð um hringveginn í júní jókst töluvert milli ára og hefur umferðin aukist alla mánuði ársins að apríl undanskildum samkvæmt samantekt Vegagerðarinnar.

Aukningin í júní mælist 2,6 prósent samanborið við júní í fyrra, sem er töluvert mikil aukning milli ára, að mati Vegagerðarinnar. Stofnunin spáir því nú að umferð um hringveginn aukist um 3,5 prósent á árinu.

Umferðin jókst í öllum landshlutum utan við nágrenni höfuðborgarsvæðisins, þar sem hún dróst saman um 0,1 prósent. Ástæðurnar má líklega rekja til veðurfarsins, enda veruleg aukning á Norður- og Austurlandi þar sem tíðin var góð á sama tíma og veðrið á höfuðborgarsvæðinu var kalt og blautt.