82 prósent vilja kjósa um ESB á næsta ári

Mikill meirihluti landsmanna vill að kosið verði um framhald aðildarviðræðna við Evrópusambandið samhliða sveitastjórnarkosningum á næsta ári. Þetta sýna niðurstöður skoðanakönnunar Stöðvar tvö og Fréttablaðsins.

Alls sögðust tæplega 82 prósent þeirra sem afstöðu tóku í könnuninni vilja þjóðaratkvæðagreiðslu samhliða sveitastjórnarkosningunum, en um 18 prósent sögðust því andvíg.

Um það bil þrír af hverjum fjórum stuðningsmönnum stjórnarflokkanna vilja kjósa um framhald aðildarviðræðnanna samhliða sveitastjórnarkosningunum. Um 73 prósent stuðningsmanna Framsóknarflokks vilja að það verði framhald málsins, og ríflega 78 prósent stuðningsmanna Sjálfstæðisflokksins.

Lítill munur er á afstöðu stuðningsmanna stærstu stjórnarandstöðuflokkanna þriggja, en um 89 prósent þeirra vilja halda þjóðaratkvæðagreiðsluna samhliða sveitastjórnarkosningunum á næsta ári. Stuðningsmenn Pírata skera sig aðeins frá, en um 76 prósent þeirra vilja ljúka málinu með þessum hætti.

Könnunin var gerð dagana 26. og 27. júní síðastliðinn. Hringt var í 1.077 manns þar til náðist í 800.

Spurt var: Vilt þú að þjóðaratkvæðagreiðsla um framhald aðildarviðræðna við Evrópusambandið fari fram samhliða sveitastjórnarkosningum næsta vor? Tæplega 88 prósent þátttakenda tóku afstöðu til spurningarinnar.