Árs fangelsi fyrir að brjóta kynferðislega á unglingsstúlku

44 ára gamall karlmaður var dæmdur í tólf mánaða óskilorðsbundið fangelsi í Héraðsdómi Reykjavíkur fyrir að brjóta kynferðislega á fimmtán ára gamalli stúlku sem var í heimsókn hjá föður sínum í september árið 2012.

Í ákæru segir að hann hafi neytt stúlkuna til að þola önnur kynferðismök, kynferðislega áreitni og lostafengna og ósiðlega háttsemi, sem var til þess fallin að særa blygðunarkennd stúlkunnar, með því að bera á sér kynfærin og fróa sér ítrekað fyrir framan og upp við hana.

Verjandi mannsins vildi vísa ákærunni frá dómi þar sem hún þótti óskýr, en dómari hafnaði því.

Maðurinn var drukkinn þegar atvikið átti sér stað. Hann játaði brotið að hluta en neitaði að hafa snert andlit stúlkunnar með kynfærum sínum.

Maðurinn var sýknaður af nauðgun. Í niðurstöðu dómsins segir: Ákærði hafði hvorki samræði né önnur kynferðismök við brotaþola og verður brot hans því ekki talið nauðgun.

Maðurinn var því sakfelldur fyrir brot á barnaverndarlögum auk þess sem hann særði blygðunarsemi stúlkunnar. Hann var því fundinn sekur um kynferðisbrot.

Manninum er gert að greiða stúlkunni 800 þúsund krónur í miskabætur.

Dóminn má nálgast hér.