Málþófi Pírata lokið

Málþófi Pírata er nú lokið. Þetta kemur fram í fréttatilkynningu sem flokkurinn sendi frá sér fyrir skömmu. Fyrir helgi sendu Píratar forseta Íslands opið bréf um að þau myndu þæfa mál um lækkun á veiðigjaldi þar til hann kæmi til landsins. Forsetaritari hefur nú staðfest að forsetinn sé kominn til landsins og þar með er meiginmarkmiði með málþófi Pírata náð. Málskotsrétturinn er nú í höndum forsetans.

Þingmenn flokksins skora engu að síður á forseta að synja lögum um lækkun veiðigjalda um staðfestingu og skjóta málinu í þjóðaratkvæðagreiðslu. Rúmlega 34 þúsund manns hafa skrifað undir undirskriftalista þess efnis. Píratar óska nú eftir fundi með forsetanum þar sem þeir vilja ræða  framgöngu beins lýðræðis á Íslandi.