Óvenjulegan feng rekur á fjörur fisksala

„Margt furðulegt hefur gerst í fiskbúðinni en þetta er það furðulegasta,“ segir Kristján Berg sem betur er þekktur sem Fiskikóngurinn.

Á Facebooksíðu sinni hefur Fiskikóngurinn birt mynd og greinir frá því að fjögur eintök „fullorðinsmynda“ hafi tapast á bílaplaninu fyrir framan fiskverslunina. „Sá/sú sem á þetta getur vitjað myndanna á opnunartíma. Væri best að koma sem fyrst, þannig að við þurfum ekki að geyma þetta lengi. Takk.“

Jafnframt segir í auglýsingunni, með kveðju frá starfsfólki Fiskikóngsins, að nauðsynlegt sé að sá sem komi og vitji myndanna geti sannað að hann sé réttur eigandi svo myndirnar lendi hjá réttum aðila.

„Það kom eldri kona með þetta inn til okkar. Einhver hefur tapað þessu úti á bílaplani. Svo kíkti maður í pokann og fór hjá sér. Gömul kona með dónamyndir í poka. En hún lét sér hvergi bregða.“ Að sögn Fiskikóngsins er ómögulegt að segja til um hver eigi þessar DVD myndir, sem eru enn í plastinu, óuppteknar og ótextaðar. „Eins og heimurinn er í dag þá gætu þetta verið bæði kynin. Á einu hulstrinu eru tvær stúlkur að leik. Heimurinn er orðinn rugl og klámkynslóðin lætur sér fátt fyrir brjósti brenna. En, þetta er í góðri vörslu hjá Fiskikóngnum,“ segir Fiskikóngurinn, fjallhress að vanda.