Gæludýrahótel vel nýtt yfir sumartímann

Aðsókn á gæludýrahótel hefur aukist mikið undanfarin ár í takt við aukna gæludýraeign landsmanna. Júlí er fullbókaður á Hundahótelinu Leirum og sömu sögu er að segja á hótel Kattholti. Þar dvelja dýrin í góðu yfirlæti á meðan eigendurnir eru í sumarfríi.

Á  Hundahótelinu Leirum dvelja nú þrjátíu hundar og þrjár kisur en þar geta allar gæludýrategundir dvalið. Hreiðar Karlsson hefur rekið hótelið í tuttugu ár og segir alltaf nóg að gera. Þó mest yfir sumartímann og um hátíðir eins og jól og áramót, þá sé allt yfirfullt.

Fastagestir hundahótelsins eru margir og segir Hreiðar að þeim fari fjölgandi í takt við aukna hundaeign landsmanna. Hann segir flesta hunda geta dvalið um tíma annars staðar en  heima hjá sér.

„Hundarnir eru  mjög fljótir að aðlagast. Ég hef aldrei neitað hundi gistingu þó þeir geti sumir verið dálítið ágengir og leiðinlegir," segir Hreiðar.

Sólarhringurinn fyrir einn hund kostar 2.200 krónur á Leirum, vikan yrði því á rúmar fimmtánþúsund krónur. Ýmis afsláttur bætist við ef hundarnir eru fleiri en einn eða dvelja í lengri tíma. En hvað með kisuna á heimilinu? Stærsta kattahótel landsins er í Kattholti en þar er verð fyrir hvern kött 1200 krónur á sólarhring. Viku pössun er þá komin upp í 8400 krónur. Tuttugu og fjögur þúsund krónur gætu því bæst við sumarfrískostnað fjölskyldunnar ef hundurinn og kötturinn eru sett á hótel í viku.

Strax í vor var júlímánuður nánast uppbókaður á hótel Kattholti og þar dvelja í dag fjörtíu kettir. Fullbókað er fram yfir verslunarmannahelgi.

„Það er mjög vinsælt að láta þá dvelja hér í viku til tíu daga en kettirnir eru hérna allt frá tveimur dögum og upp í mánuð," segir Halldóra Snorradóttir starfsmaður Kattholts.

Hótelið hefur verið starfrækt síðan Kattholt opnaði fyrir tuttugum árum síðan og segir Halldóra vinsældir þess aukast ár frá ári.

„Það eru allir kettir velkomnir en þeir þurfa að vera full bólusettir og fressar geltir."

Halldóra á sér uppáhalds kisu á hótelinu, gulbröndótta fressin Bangsa sem hún segir mannelskan og skemmtilegan.

En það eru ekki allar kisurnar í sumarfríi í Kattholti því heimilislausir kettir eru þar í miklum meirihluta.

„Núna eru  um það bil sextíu óskilakettir, það er mikið. Á sumrin er metfjöldi katta og þetta er mjög mikið af köttum," segir Halldóra.

Ágætlega gengur að koma köttunum út að sögn Halldóru þó lítið fari af þeim yfir sumartímann þegar fólk er í fríi.