Gullkaupmaður segir konur á miðjum aldri langstærsta kúnnahópinn

Félag Íslenskra gullsmiða er byrjað að leggja drög að hertari reglum um gullkaup hér á landi í samstarfi við innanríkisráðuneytið meðal annars vegna hættu á að þjófum sé auðveldað að selja þýfi með tilvist slíkra viðskipta.

Gullkaupmaður segist fagna hertum reglum, en segir langflesta viðskiptavini sína konur yfir miðjum aldri.

Félag Íslenskra gullsmiða vill hertari reglur um gullkaup hér á landi. Formaður félagsins, Arna Arnardóttir, sagði í samtali við fréttastofu að félagið væri byrjað að vinna drög að reglum varðandi gullkaup í samtarfi við innanríkisráðuneytið.

Morgunblaðið fjallaði um málið í dag en þar var meðal annars haft eftir Óla Jóhanni Daníelssyni, gullsmíðameistara, að gullkaupmenn bjóði þjófum upp á að losa sig við þýfi.

Sverrir Einar Eiríksson hefur keypt gull frá hruni og segir viðskiptin ganga vel. Hann kannast þó ekki við að viðskiptavinir sínir séu þjófar.

„Langflestir viðskiptavinir mínir eru konur um og yfir miðjum aldri, allavega svona 95 prósent,“ segir Sverrir Einar og bætir við að skartið sem þær selja sé gamlt og oft brotið eða ónýtt.  Þá sé einnig verið að selja skart úr dánarbúum.

Sverrir segist ekki greiða fyrir skartið með reiðufé, heldur séu peningarnir lagðir inn á bankareikning viðkomandi. Það auðveldar nokkuð eftirlit, komi upp þjófnaðarmál.

En eru gullkaupmenn mótfallnir því að herða reglur um þessi viðskipti?

„Það er ágætt að fá ramma utan um öll viðskipti, en það má ekki verða þannig að það bitni á viðskiptavinunum,“ segir Sverrir.

Spurður hvort Sverrir hafi keypt þýfi, segist hann aðeins einu sinni hafa orðið var við að þjófar reyndu að selja honum illa fengna skartgripi:

„En ég áttaði mig á því og sagði hinum sama að hypja sig og koma aldrei aftur,“ segir Sverrir og bætir við að hann hafi ekki orðið var við það aftur að þjófar hafi reynt að selja honum þýfi.