"Þetta kom bara til mín, ég veit ekki afhverju"

Ólafur Darri Ólafsson hlaut í gær verðlaun sem besti leikari í aðalhlutverki á alþjóðlegu kvikmyndahátíðinni í Karlovy Vary í Tékklandi fyrir leik sinn í kvikmyndinni XL. Hann segir óvenjulega þakkarræðu sína hafa vakið mikla athygli í gærkvöldi.

Hátíðin í Karlovy Vary er ein sú elsta í heiminum og mjög virt, svo verðlaunin fela í sér mikinn heiður. Við slóum á þráðinn til Ólafs í morgun, þegar hann var að vakna eftir skemmtileg hátíðahöld gærdagsins og spurðum hvort hann hefði átt von á að hljóta verðlaunin.

„Mig hefur alveg dreymt um að lenda einhvern tímann í þessari aðstöðu en þú getur ekki átt von á því þegar það eru svona ofboðslega margir leikarar og góðar myndir sem eru að keppa á móti þér. Þannig að mig dreymdi ekki um að ég myndi fá þetta," segir Ólafur Darri í samtali við fréttastofu.

Ólafur segir myndina XL hafa verið gerða af ástríðu en litlum efnum og verðlaunin skipti sköpum.

„Þau hjálpa okkur við dreifingu á þessari mynd, þetta þýðir að hún fer örugglega á miklu fleiri kvikmyndahátíðiar og kannski verður einhver nógu klikkaður til að kaupa og hana og sýna hana í bíó."

Þrjú dreifingarfyrirtæki hafa þegar haft samband við aðstandendur  myndarinnar með möguleg kaup og dreifingu í huga.

Þakkarræða Ólafs í gær vakti mikla athygli og lauk hann henni með því að þakka fyrir sig með því að öskra eins og risaeðla.

En afhverju risaeðluöskur?

„Þetta kom bara til mín, ég veit ekki af hverju. Ég hugsaði með mér hvernig ég gæti tjáð mjög skýrt hvernig mér leið og fannst þetta vera bara besta hugmyndin. Mér sýnist menn hafa verið ánægðir, það var alla vega mikið af fólki sem tók í spaðann á mér í gær og þakkaði mér fyrir öskrið,“ segir Ólafur Darri að lokum.

Sjá má frétt Stöðvar 2 frá því í gær hér.