Íslendingar gætu misst atkvæðarétt fyrir að virða ekki kynjakvóta

Í morgun var tillaga þingskapa og stofnananefndar Evrópuráðsþingsins, um refsiaðgerðir vegna samsetningu íslandsdeildarinnar kynnt og um hana verður svo kosið seinna í dag. Tillagan felur í sér hvort beri að taka af Íslandsdeild Evrópuráðsins atkvæðisrétt á næsta þingi, ef ekki verði búið að laga samsetningu nefndarinnar strax í haust.

Þingmenn á Evrópuráðsþinginu, sem nú fundar í Strassborg, gerðu í vikunni alvarlegar athugasemdir við skipan íslensku sendinefndarinnar þar sem hún samræmist ekki reglum um kynjakvóta.

Í nefndinni sitja þeir Brynjar Níelsson, Ögmundur Jónasson og Karl Garðarsson sem jafnframt er formaður íslandsdeildarinnar.

„Þessi tillaga er í samræmi við það sem við bjuggumst við," segir Karl Garðarsson í samtali við fréttastofu. Hann segir nefndina sátta við niðurstöðuna og hún sé í samræmi við það sem þeir bjuggust við.

"Þetta þýðir að við höfum atkvæðisrætt og setu á þessu þingi en þurfum að breyta nefndinni fyrir næsta fund í október,"segir Karl.

Spurður hvort ekki verði örugglega stokkað upp í nefndinni fyrir það segir Karl: „Henni verður breytt það er alveg á hreinu."

Brynjar Níelsson, einn nefndarmanna, virðist þó ekki sammála Karli að öllu leyti. Hann segir á facebook síðu sinni í morgun að þó enginn ágreiningur sé um að nefndin samrýmist ekki reglum Evrópuráðsins um kynjakvóta eigi hann bágt með að skilja hvernig þingið geti sett slíkar reglur.

Með því séu lýðræðislegar kosningar hafðar að engu. Þar vísar Brynjar til þeirrar staðreyndar að nefndarmenn Evrópuráðsþingsins voru kosnir af stjórnmálaflokkunum.