Umhverfisvernd ekki einkamál vinstri manna

Umhverfisvernd er ekki einkamál vinstri manna og hægri menn ættu að átta sig á þeim verðmætum sem geta falist í henni. Þetta segir annar forsvarsmanna nýrra samtaka sem bera heitið Sjálfstæðir umhverfisverndarsinnar.

Örn Halldórsson, arkítekt en hann og félagi hans listamaðurinn Pétur Gautur ákváðu að vekja umræðu á umhverfismálum meðal hægri manna um mikilvægi umhverfisverndar. Segir hann að hugmyndin hafi vaknað eftir að þeir ræddu saman um innihald viðtals við Pétur Gaut í Morgunblaðinu um helgina en í því ræddi hann meðal annars stöðu hægri manna í listum. 

"Hingað til hefur maður verið stimplaður sem vinstri grænn ef maður hefur áhuga á umhverfinu. En ég og margir aðrir vilja meina að það sé bara rangt."

Örn segir að vissulega séu Vinstri græn brautryðjendur í þessum málum en umhverfisvernd eigi erindi við fleiri eða eins og hann segir á síðunni Sjálfstæðir umhverfisverndarsinnar sem hann stofnaði til að koma skilaboðum um þetta áleiðis: Maður getur alveg verið helblár og samt þótt vænt um náttúruna og viljað henni allt hið besta.

Sjálfur starfaði hann sem landvörður og furðaði sig á því hvers vegna ferðmenn væru ekki rukkaðir fyrir ferðir sínar um landið rétt eins og annarsstaðar. Lauslegir útreikningar hans bendi til þess að sveitarfélög gætu haft af því mun meiri tekjur heldur en af fasteignagjöldum.

Gjaldtaka nýtist líka til verndunar á svæðunum. "Fólki þykir þetta sjálfsagt mál og verðmæti svæðisins eykst í augum fólks og það dvelur lengur við," segir Örn. Og bætir við í gríni og alvöru að vilji menn græða á daginn og grilla á kvöldin sé eins gott fyrir þá að eiga góðan garð.