Talaði máli Snowden á þingi Evrópuráðsins

Ögmundur Jónasson tók upp málefni bandaríska uppljóstrarans Edwards Snowdens á þingi Evrópuráðsins í morgun og hvatti einstaklinga og ríkisstjórnir og Evrópuráðið sjálft til að taka upp hanskann fyrir „uppljóstrara í þágu lýðræðis“ að því er fram kemur í tilkynningu frá sendinefndinni. 

Þar segir að mál Snowdens komi öllum við, óháð landamærum, því upplýsingarnar sem bandarísk lögregluyfirvöld hafa krafið öll helstu fyrirtækin á internetinu, þar á meðal Google, Facebook, Skype og fleiri, að láta sér í té, væru persónuupplýsingar sem nota mætti til að kveða niður eðlilega lýðræðislega umræðu. Persónunjósnir af þessu tagi væru hrein ógn við sjálfar undirstöður réttarríkisins.

Þá ræddi Ögmundur líka ofbeldisefni á netinu og sagði að verkefnið væri nú að taka djúpa málefnalega umræðu um þetta efni með það að leiðarljósi að sporna gegn því að ofbeldisiðnaðurinn þrengdi sér inn í líf barna eins og rannsóknir sýndu að væri að gerast. Að meðaltali væru börn að meðaltali 11 ára gömul þegar þau færu að horfa á ofbeldisfullt klámefni sem sölumenn væru orðnir naskir á að koma á framfæri við börn og ungmenni.

Ögmundur hrósaði svo Evrópuráðinu sérstaklega fyrir að sinna vel málefnum barna og vísaði í því sambandi til vitundarvakningar um kynferðisofbeldi gagnvart börnum og sagði að áhrifa af frumkvæði Evrópuráðsins á þessu sviði gætti nú víða um lönd, þar á meðal á Íslandi þar sem sérstakt átak hefði verið gert í þessa veru.