Unnustu Stefáns Einars sagt upp hjá VR

Söru Lind Guðbergsdóttur, fyrrverandi deildarstjóra ráðgjafadeildar VR, var sagt upp störfum í byrjun vikunnar vegna skipulagsbreytinga innan félagsins. Sara Lind er unnusta Stefáns Einars Stefánssonar, fyrrverandi formanns VR.

Stjórn VR kom saman til fundar í hádeginu í dag og var uppsögn Söru Lindar meðal annars rædd þar, eftir því sem fréttastofa kemst næst. Samkvæmt upplýsingum fréttastofu vildu einhverjir stjórnarmenn að uppsögn Söru Lindar yrði umsvifalaust dregin til baka og hún beðin afsökunar, þar sem hún væri ólögmæt.

Meirihluti stjórnarinnar neitaði hinsvegar að taka uppsögnina til umræðu. Og hefur fréttastofan eftir heimildum að Ólafía Rafnsdóttir, formaður VR, hafi meðal annars komið þeim sjónarmiðum á framfæri við stjórnarmenn að uppsögnin væri í samræmi við lög VR og því lögmæt.

Ólafía vildi ekki tjá sig um fundinn í hádeginu og sagði hann trúnaðarmál, þegar fréttastofa hafði samband við hana eftir hádegi í dag. „Ég ræði ekki við fjölmiðla um einstaka mál sem að koma fram á stjórnarfundi,“ sagði hún.

Sara Lind hefur starfað hjá VR í rúmlega ár. Ólafía tók við af Stefáni Einari í mars síðastliðnum sem formaður VR.