Réðst á ólétta konu og var stunginn í kviðinn

Karlmaður var sýknaður af tilraun til manndráps en sakfelldur fyrir líkamsárás í Héraðsdómi Reykjaness í dag. Maðurinn stakk annan karlmann í kviðinn í Kópavogi í febrúar á síðasta ári.

Sá sem var stunginn átti upptökin að átökunum en hann reif í hár óléttrar kærustu mannsins og dró hana að bíl sem hann sakaði hana um að hafa stolið, það reyndist byggt á misskilningi.

Töluverður stærðarmunur var á mönnunum, en hinn ákærði var á kafi í fíkniefnum á þessum tíma, og var aðeins sextíu kíló að eigin sögn. Sá sem var stunginn hafi lamið manninn ítrekað sem endaði með því að hinn ákærði stakk hann, en sjálfur segist hann hafa ekki ætlað að drepa manninn, heldur fæla hann frá.

Í ljósi þess að maðurinn réðist á óléttu konuna að fyrra bragði þótti dóminum fullsannað að han hefði átt upptökin að átökunum en dómurinn telur ósannað að maðurinn hafi ætlað að bana brotaþolanum.

Var hann því dæmdur í átján mánaða fangelsi, þar af eru fimmtán mánuðir skilorðsbundnir. Þá er talið manninum til tekna að hann hefur snúið við blaðinu og hætt vímuefnanotkun.